باہر وبا کا خوف ہے گھر میں بلا کی بھوک
کس موت سے مروں! زرا رائے دیجئے
لاہور کے علاقہ کاہنہ نو میں واقع (بستی عید گاہ) میں واقع ایک انتہائی افسوسناک واقع رونما ہوا ۔ایک گھر کی چھت گرنے سے 20 بچوں سمیت ایک ٹیچر شدید ذخمی ہوئیں واقعے کے نتیجے میں 14 بچے دنیا فانی سے رخصت ہو گئے اور جو باقی بچے وہ ابھی زخمی حالت میں اسپتال میں زیر علاج ہیں۔ان بچوں کو پڑھا رہی تھیں (حمیدہ بی بی) وہ بھی اس گرنے والی بدقسمت چھت کے ملبے تلے آکر شدید زخمی ہیں اس کے ساتھ ساتھ اس کی ایک بیٹی بھی اس واقعے میں اللہ کو پیاری ہو گئیں۔ اب سوال یہ پیدا ہوتا ہے کہ اس سارے واقع کی زمہ داری آخر کس پر عائد ہوتی ہے حکام بالا پر،مالک مکان پر ،غربت اور بےروزگاری اس سب کی زمہ دار ہے یا پھر وہ بد قسمت استانی جو اپنی محنت کے ساتھ غریب بچوں کو معقول فیس کے ساتھ علم کی روشنی فراہم کر رہی تھی ؟بدقسمتی سے حسب معمول تحقیقاتی اداروں کی رپورٹ آچکی ہے جس میں ٹھیکدار،مالک مکان اور مزدوروں کو زمہ دار قرار دیا گیا ہے ۔ما لک مکان کا کہنا ہے کہ بارش کی وجہ سے گھر کی چھت ٹپکتی تھی ۔ہمارا گزر بسر بڑی مشکل سے ہوتا ہے اور میری بیوی میرا ہاتھ بٹانے کے لئے گھر میں بچوں کو ٹیوشن پڑھاتی ہیں میں خود ایک پھل فروش ہوں اس طرح بڑی مشکل سے ہماری فیملی کا گزر بسر ہورہا تھا ۔مجھے بہت دکھ ہوتا ہے کہ ہمارے حکمران کب ہوش کے ناخن لیں گے ۔ایک دور تھا کہ جب حضرت عمر فاروق کا دور حکومت تھا ۔تو خوف خدا اس قدر تھا کہا گیا کہ!
دریائے فراط کے کنارے اگر کوئی کتا بھی بھوکا مر گیا تو اس کا جواب دہ بھی میں ہوں
ہمارے ہاں تو اتنی بے حسی ہے کہ ساری کی ساری زمہ داری انہیں لوگوں پر ڈال دی جاتی ہے جو پہلے ہی اپنی زندگی بڑی مشکل سے گزار رہے ہوتے ہیں ۔افسوس اس بات پر ہے کہ قیمتی جانیں ضائع ہو گئیں لیکن بجائے امداد کرنے کے الٹا محنت محنت کرنے والوں کو قصور وار قرار دیا گیا ۔اس بات سے کوئی انکار نہیں ہے کہ ان مزدوروں کو کام سے پہلے گائیڈ کیا جاتا اور حفاظتی اقدامات اٹھائے جاتے تو بہت سی قیمتی جانیں بچ جاتیں۔مگر افسوس سے کہنا پڑتا ہے کہ ہمارے ادارے غفلت کی نیند سو رہے ہیں ۔کیا ہمارے ادارے کا کام نہیں ہے کہ وہ تمام بلڈنگ کا معمول کے مطابق معائنہ کرے؟ ایسا کیوں ہے کہ جب بھی کوئی اس طرح کا واقع رونما ہوتا ہے تو فوری طور پر سب ادارے حرکت میں آجاتے ہیں اور کیا ان اداروں کا کام نہیں ہے کے بروقت اس کے لئے حفاظتی اقدامات اٹھائیں تا کہ اس طرح کے کے جانی اور مالی نقصانات سے بچا جا سکے۔
افسوس اس سارے واقع کی زمہ داری بجائے زمہ دار لوگوں پر ڈالنے کے الٹا اس غریب فیملی پر ڈالی جا رہی ہے جو پہلے سے غربت اور بھوک سے جنگ لڑ رہے ہیں اس کے علاوہ جو ٹیچر ہے وہ بھی شدید ذخمی ہے اور زندگی موت کی جنگ لڑ رہی ہے انہیں اس واقع کا زمہ دار قرار دینا انتہائی افسوسناک عمل ہے ۔ایک تو غریب بھوک سے مر رہا ہے اوپر سے یہ ظلم ان لوگوں کو جینے نہیں دیتا۔تعلیم یافتہ افراد کی شرح پہلے ہی بہت کم ہے جس کی بنیادی وجہ بے جا فیس اور ناقص تعلیمی نظام ہیں ایسے میں اگر کوئی انسان اپنی مدد آپ کے تحت غریب کے بچوں کے بہتر مستقبل کے لئے کوشش میں لگا ہے تو اسے مجرم بنانے کی کوشش کی جارہی ہے ۔میری دردمندانہ اپیل ہے حکومت وقت سے کہ ان لوگوں کو مجرم نہ بنایا جائے یہ ایک آزمائش تھی جو اللہ کی طرف سے ہم پر آئی اس آزمائش سمجھ کر آئندہ کے لئے فوری حفاظتی اقدامات کئے جائیں ۔
میں کہیں بھوک سے نہ مرجاوں اے امیر شہر
گر مسقبل ہوں تہماراتو بچا لو مجھ کو
میری سکول ایجوکیشن ڈیپارٹمنٹ سے درخوست ہے کہ فوری طور پر جہاں تعلیم کی بنیادی ضروریات موجود نہیں ہیں وہاں انکی فراہمی یقینی بنائی جائے۔اور ایسے لوگ جو اپنی مدد آپ کے تحت معاشرے میں علم کی روشنی پہلا رہے ہیں انہیں مجرم نہ بنایا جائے۔شکریہ
اذقلم: ندیم احمد ناداں میو

​تحریر: انزلہ صدیقی

انسانی معاشرے کی بنیاد جس بنیادی اینٹ پر رکھی گئی ہے، اسے ‘برداشت’ کہتے ہیں۔ کائنات کا پورا نظام ایک خاص توازن اور باہمی ہم آہنگی سے چل رہا ہے۔ درخت زمین سے جڑے ہیں، دریا اپنے راستوں پر رواں ہیں، اور رات دن کو راستہ دے رہی ہے۔ اس پورے نظام میں ایک دوسرے کے وجود کو تسلیم کرنے کا ایک خاموش معاہدہ موجود ہے۔ لیکن جب ہم انسانی معاشرت، اور بالخصوص اپنے سیاسی منظر نامے پر نگاہ ڈالتے ہیں، تو روح کانپ اٹھتی ہے۔ ایسا لگتا ہے جیسے ہم نے اختلافِ رائے کو ایک گناہِ کبیرہ بنا دیا ہے اور سیاست، جو کبھی نظریات کی جنگ اور عوامی خدمت کا ذریعہ ہوا کرتی تھی، اب محض ذاتی دشمنی اور انا کا اکھاڑا بن چکی ہے۔ سیاست میں برداشت کا یہ فقدان ہمارے پورے معاشرتی ڈھانچے کو دیمک کی طرح چاٹ رہا ہے۔

اگر ہم ماضی کے دریچوں میں جھانکیں، تو سیاست کا ایک انتہائی خوبصورت اور باوقار چہرہ سامنے آتا ہے۔ ایک ایسا دور بھی تھا جب سیاسی رہنما پارلیمنٹ کے اندر ایک دوسرے پر سخت ترین تنقید کرتے تھے، لیکن جیسے ہی ایوان سے باہر نکلتے، تو ایک دوسرے کے ساتھ چائے کی پیالی پر بیٹھ کر مسکراتے ہوئے گفتگو کرتے تھے۔ وہ نظریات کے مخالف تھے، ایک دوسرے کے وجود کے دشمن نہیں تھے۔ ان کا لہجہ تلخ ضرور ہوتا تھا، لیکن اس تلخی میں بھی ایک رکھ رکھاؤ، ایک تہذیب اور ایک ادبی چاشنی ہوا کرتی تھی۔ وہ لفظوں کا چناؤ اس طرح کرتے تھے کہ بات بھی پوری ہو جائے اور سامنے والے کی عزتِ نفس پر حرف بھی نہ آئے۔ مگر آج کا سیاسی منظر نامہ اس کے بالکل برعکس ہے۔ اب گفتگو میں دلیل کی جگہ چیخ و پکار نے لے لی ہے ۔

کسی بھی معاشرے کی پختگی کا اندازہ اس بات سے نہیں لگایا جاتا کہ وہاں سب کی رائے ایک ہے، بلکہ اس بات سے لگایا جاتا ہے کہ وہاں مختلف آراء کو کتنی عزت اور احترام کے ساتھ سنا جاتا ہے۔

برداشت کا مطلب یہ ہرگز نہیں کہ آپ دوسرے کی بات سے اتفاق کریں۔ برداشت کا اصل مفہوم یہ ہے کہ آپ کو دوسرے کے اختلاف کرنے کے حق کو تسلیم کرنا ہوگا۔ جمہوریت کا حسن ہی اس بات میں ہے کہ یہاں ہر رنگ، ہر نسل اور ہر نظریے کے انسان کو اپنی آواز اٹھانے کا حق حاصل ہو۔ جب ہم سیاست سے اس حسن کو چھین لیتے ہیں، تو جمہوریت ایک ایسی آمریت کی شکل اختیار کر لیتی ہے جہاں صرف ایک ہی آواز کو درست مانا جاتا ہے۔ آج ہماری سیاست میں یہ چلن عام ہو چکا ہے کہ جو میرے ساتھ نہیں، وہ ملک کا خیر خواہ نہیں ہو سکتا۔ یہ سوچ انتہائی خطرناک ہے، کیونکہ یہ معاشرے کو دو حصوں میں تقسیم کر دیتی ہے اور محبتوں کی جگہ نفرتوں کی دیواریں کھڑی کر دیتی ہے۔

اس پورے منظر نامے میں سوشل میڈیا نے جلتی پر تیل کا کام کیا ہے۔ جہاں ٹیکنالوجی کو انسانوں کو قریب لانا چاہیے تھا، وہاں اس نے فاصلوں اور تلخیوں میں بے پناہ اضافہ کر دیا ہے۔ آج ہر شخص اپنے ہاتھ میں ایک ورچوئل ہتھیار لیے بیٹھا ہے اور جیسے ہی کسی کی رائے اس کی پسند کے معیار پر پوری نہیں اترتی، وہ اس پر لفظی گولیوں کی بوچھاڑ کر دیتا ہے۔

نرم اور دھیمے لہجے کی طاقت ہمیشہ چنگھاڑنے والی آواز سے زیادہ ہوتی ہے۔ جب آپ دھیمے لہجے میں دلیل کے ساتھ بات کرتے ہیں، تو وہ سننے والے کے دل میں اترتی ہے۔ لیکن جب آپ چیخ کر اپنی بات منوانے کی کوشش کرتے ہیں، تو سامنے والا آپ کی بات سننے کے بجائے اپنے دفاع کی دیواریں اونچی کر لیتا ہے۔ ہماری سیاسی قیادت کو یہ سمجھنے کی سخت ضرورت ہے کہ ان کا ہر بول، ان کا ہر عمل اور ان کا ہر اشارہ لاکھوں انسانوں کے رویوں کی تشکیل کرتا ہے۔ اگر قیادت خود ٹی وی اسکرینوں پر بیٹھ کر غصے، نفرت اور عدم برداشت کا مظاہرہ کرے گی، تو گلی محلوں میں رہنے والے عام کارکن سے تہذیب کی امید کیسے رکھی جا سکتی ہے؟

سیاست میں برداشت کے اس فقدان نے ہماری نوجوان نسل کو سب سے زیادہ متاثر کیا ہے۔ نوجوان، جو کسی بھی قوم کا مستقبل ہوتے ہیں، اب سیاست کو ایک تعمیری عمل کے بجائے ایک تخریبی کھیل سمجھنے لگے ہیں۔ ان کے ذہنوں میں یہ بات بیٹھ رہی ہے کہ کامیابی حاصل کرنے کے لیے بدتمیزی، جارحیت اور دوسروں کو نیچا دکھانا ضروری ہے۔ یہ ایک ایسی فکری پستی ہے جس کے نتائج ہمیں آنے والی کئی دہائیوں تک بھگتنا پڑیں گے۔ اگر ہم نے اب بھی اپنے رویوں پر نظرِ ثانی نہ کی، تو ہم ایک ایسا معاشرہ بن جائیں گے جہاں امن و آشتی کا تصور صرف کتابوں تک محدود رہ جائے گا۔

اختلاف کا ہونا زندگی کی علامت ہے۔ اگر اس دنیا میں سب لوگ ایک ہی جیسا سوچنے لگیں، تو یہ کائنات بے رنگ اور بے جان ہو جائے۔ فکر کا یہ تنوع ہی انسانی ارتقاء کا ضامن ہے۔ ضرورت اس امر کی ہے کہ ہم سیاست میں مکالمے کی روایت کو دوبارہ زندہ کریں۔ مکالمہ وہ راستہ ہے جہاں دو مختلف سوچ کے حامل افراد ایک دوسرے کے سامنے بیٹھتے ہیں، اپنی بات کہتے ہیں اور دوسرے کی بات کو ٹھنڈے دل سے سنتے ہیں۔ مکالمے کا مقصد کسی کو ہرانا یا خود کو سچا ثابت کرنا نہیں ہوتا، بلکہ اس کا مقصد ایک درمیانی راستہ تلاش کرنا ہوتا ہے جہاں سب کا بھلا ہو۔

آئیے، ایک لمحے کے لیے رکیں اور سوچیں کہ ہم اپنے ملک کو کس سمت لے کر جا رہے ہیں۔ سیاست اقتدار کے حصول کا نام نہیں، بلکہ یہ ایک امانت ہے جس کا مقصد عوام کی فلاح و بہبود ہے۔ جب تک ہماری سیاست میں رواداری، درگزر اور ایک دوسرے کے احترام کا جذبہ بیدار نہیں ہوگا، ہم ایک مہذب قوم نہیں بن سکتے۔ وقت کا تقاضا ہے کہ تمام سیاسی دھارے اپنے ذاتی اور سیاسی مفادات سے بالاتر ہو کر ایک میز پر بیٹھیں اور یہ عہد کریں کہ وہ اپنے لہجوں میں نرمی، دلوں میں وسعت اور سیاست میں برداشت کو دوبارہ جگہ دیں گے۔

ہمیں یہ بات ہمیشہ یاد رکھنی چاہیے کہ حکومتیں آتی جاتی رہتی ہیں، اقتدار کے سورج طلوع اور غروب ہوتے رہتے ہیں، لیکن جو چیز باقی رہ جاتی ہے وہ انسان کا کردار اور اس کا رویہ ہے۔ اگر ہم نے سیاست کی اس جنگ میں اپنی اخلاقیات اور تہذیب کو کھو دیا، تو پھر حاصل ہونے والی کوئی بھی فتح دراصل ہماری سب سے بڑی شکست ہوگی۔ اب وقت آ گیا ہے کہ ہم نفرتوں کے اس بازار کو بند کریں اور محبت، اخوت اور برداشت کے چراغ روشن کریں، تاکہ ہماری آنے والی نسلیں ایک پرامن اور مہذب ماحول میں سانس لے سکیں۔

تحریر: انزلہ صدیقی

 آگ برس رہا ہے، سڑکیں سنسان ہیں، اور پرندے بھی چھاؤں ڈھونڈ رہے ہیں ۔کہتے ہیں موسم بدلتے ہیں تو رنگ لاتے ہیں، مگر اب ہمارے ہاں موسم بدلتے ہیں تو رنگ نہیں، بلکہ خوف اور سنسنی لاتے ہیں۔ جون کا آغاز ہوتے ہی یوں لگتا ہے جیسے آسمان سے کسی نے آگ کی بھٹی کا منہ اس دھرتی کی طرف کھول دیا ہو۔ سورج سوا نیزے پر ہو یا نہ ہو، لیکن لاہور, کراچی، سکھر اور نوابشاہ کی سڑکوں پر پگھلتا ہوا لک لکاتا ڈامر (کولتار) اور اڑتی ہوئی لو یہ بتانے کے لیے کافی ہے کہ ہم کسی قدرتی آفت کے دہانے پر کھڑے ہیں۔ یہ جو ہر سال مئی اور جون کے مہینوں میں اخبارات کی سرخیوں میں ’ہیٹ ویو‘، ’ہیٹ سٹروک‘ اور ’ہیٹ ایگزاسشن‘ جیسے بھاری بھرکم انگریزی الفاظ جلی حروف میں چھپتے ہیں نا، یہ محض طبی اصطلاحات یا خشک سائنسی اعداد و شمار نہیں ہیں۔ یہ ہمارے اردگرد جیتے جاگتے انسانوں کی بے بسی، سسکتی سانسوں، ہسپتالوں کے ایمرجنسی وارڈز کی افراتفری اور سرد خانوں میں گرتی لاشوں کی وہ دردناک داستانیں ہیں جنہیں ہم ہر سال دیکھتے ہیں، روتے ہیں اور پھر بھول جاتے ہیں۔

ہم بحیثیت قوم بھی عجیب المیے کا شکار ہیں۔ جب تک کوئی آفت ہمارے اپنے گھر کا دروازہ نہ کھٹکھٹا دے، جب تک ہمارا اپنا کوئی پیارا اس کی زد میں نہ آ جائے، ہم اسے ’صرف ایک خبر‘ سمجھتے ہیں اور صفحہ پلٹ کر آگے بڑھ جاتے ہیں۔ پچھلے چند سالوں سے مئی اور جون کے مہینے پچھلے سارے ریکارڈ توڑ رہے ہیں۔ درجہ حرارت جب 45 اور 50 ڈگری کو چھونے لگتا ہے تو ہم ہائے وائے مچاتے ہیں، مگر یہ بھول جاتے ہیں کہ اس تپش کو دعوت دینے میں ہمارا اپنا کتنا ہاتھ ہے۔ ہم نے ترقی اور جدیدیت کے نام پر اپنے شہروں کو کنکریٹ اور سیمنٹ کا جنگل بنا دیا۔ جہاں گھنے اور سائے دار درخت ہوا کرتے تھے، وہاں ہم نے بڑی بڑی ہاؤسنگ سوسائٹیاں اور کمرشل پلازے کھڑے کر دیے۔ درخت بے دردی سے کاٹے گئے، نہریں اور تالاب مٹی سے بھر دیے گئے، اور اب جب زمین تپ رہی ہے تو ہم ائیر کنڈیشنر کی ٹھنڈک میں بیٹھ کر سائے تلاش کر رہے ہیں۔ یہ قدرت کا وہ تازیانہ ہے جو ہمیں ہمارے ہی کیے کی سزا دے رہا ہے۔ Global Warming یا موسمیاتی تبدیلی اب کوئی کتابی بحث نہیں رہی، یہ ہمارے دروازے پر کھڑی ایک تلخ حقیقت ہے۔

طبی ماہرین ہر سال چیخ چیخ کر تھک جاتے ہیں کہ بھائی! ہیٹ ویو کے دوران اپنے جسم کے نظام کو سمجھو۔ ’ہیٹ ایگزاسشن‘ اور ’ہیٹ سٹروک‘ میں ایک واضح فرق ہے جسے جاننا ہر شہری کے لیے زندگی اور موت کا سوال بن سکتا ہے۔ جب شدید گرمی میں انسان مسلسل کام کرتا ہے اور اس کے جسم کا پانی اور نمکیات پسینے کے راستے ختم ہونے لگتے ہیں، تو سر میں شدید درد، چکر آنا، متلی، کمزوری اور جسم نڈھال ہونا شروع ہو جاتا ہے۔ یہ ’ہیٹ ایگزاسشن‘ ہے—یعنی آپ کے جسم کا آخری انتباہ (Warning Sign) کہ بس اب رک جاؤ۔ اگر اس موڑ پر انسان خود کو نہ سنبھالے، کسی ٹھنڈی یا سائے دار جگہ پر نہ جائے، اور فوری طور پر او آر ایس یا نمکول کا پانی نہ پیے، تو معاملہ اگلی ہولناک سٹیج پر چلا جاتا ہے جسے ہم ’ہیٹ سٹروک‘ کہتے ہیں۔ اور ہیٹ سٹروک کوئی ملاحظہ یا مذاق نہیں ہے۔ یہ وہ جان لیوا حالت ہے جہاں انسانی جسم کا اپنا قدرتی کولنگ سسٹم مکمل طور پر فیل ہو جاتا ہے۔ پسینہ آنا بند ہو جاتا ہے، جسم کا درجہ حرارت 104 یا 105 ڈگری تک پہنچ جاتا ہے، دماغ کام کرنا چھوڑ دیتا ہے اور انسان بے ہوش ہو کر گر پڑتا ہے۔ یہ وہ لمحہ ہوتا ہے جہاں زندگی اور موت کے درمیان فاصلہ چند منٹوں کا رہ جاتا ہے، اور اگر فوری طبی امداد نہ ملے تو اعضاء ناکارہ ہو جاتے ہیں۔

لیکن یہاں ایک کالم نگار کی حیثیت سے مجھے اس معاشرتی اور طبقاتی فرق (Social Inequality) کا اعتراف کرنا ہے جو اس ہیٹ ویو کے پیچھے چھپا ہوا ہے۔ گرمی تو سب کے لیے برابر ہونی چاہیے تھی، کیونکہ سورج تو سب پر یکساں چمکتا ہے، مگر حقیقت اس کے بالکل برعکس ہے۔ اس ہیٹ ویو کا اثر ہر ایک پر یکساں نہیں ہوتا۔ جو لوگ اپنے گھروں یا دفاتر کی چھت تلے محفوظ ہیں، ان کے لیے یہ موسم صرف ایک سفری کوفت یا عام سی پریشانی ہے، لیکن جن کا روزگار ہی کھلے آسمان تلے ہے، ان کے لیے یہ ایک کڑی آزمائش بن جاتا ہے۔ شدید گرمی کی یہ لہر ان لوگوں کے لیے تو شاید اتنی مہلک نہ ہو جنہیں سائے اور چار دیواری کی سہولت میسر ہے، لیکن ہمارے معاشرے کا وہ طبقہ جو شدید دھوپ میں باہر نکلنے پر مجبور ہے، وہ اس کا سب سے پہلا شکار بنتا ہے۔ اس تپتی دوپہر کا پہلا اور سب سے آسان نشانہ وہ دہاڑی دار مزدور ہے جو اپنے بچوں کے دو وقت کے چولہے کے لیے سڑک کنارے لوہے کے اوزار اور بیلچہ چلا رہا ہوتا ہے۔ اس کا نشانہ وہ بائیک رائیڈر ہے جو کسی کے گھر پیزا یا پارسل پہنچانے کے لیے تندور بنی سڑکوں پر خوار ہو رہا ہوتا ہے۔

ٹریفک سگنل پر کھڑا سکیورٹی گارڈ، ریڑھی بان، اور بھٹے پر کام کرنے والے مزدور اس آفت کے ہراول دستے ہیں جنہیں موت سب سے پہلے اپنی آغوش میں لیتی ہے۔

ہمارے انتظامی ڈھانچے کا روایتی المیہ یہ رہا ہے کہ ہم ہمیشہ پیش بندی کے بجائے حادثہ گزر جانے کے بعد اقدامات کی طرف متوجہ ہوتے ہیں۔ جب حالات قابو سے باہر ہونے لگتے ہیں اور ہسپتالوں پر دباؤ بڑھ جاتا ہے، تب جا کر ہنگامی اقدامات کا فیصلہ کیا جاتا ہے، جو کہ تلافی کے لیے کافی نہیں ہوتا۔ لوڈ شیڈنگ کا جن اس شدید گرمی میں مزید بے لگام ہو جاتا ہے، غریب بستیوں میں پینے کے صاف پانی کی عدم دستیابی ایک مستقل عذاب بن چکی ہے۔ اس سنگین صورتحال میں متعلقہ اداروں کی منصوبہ بندی اور ترجیحات کا فقدان واضح طور پر محسوس ہوتا ہے، جس پر اب سنجیدگی سے غور کرنے کی ضرورت ہے۔ لیکن کیا بحیثیت معاشرہ ہم بری الذمہ ہو سکتے ہیں؟ کیا ہماری کوئی اخلاقی ذمہ داری نہیں بنتی؟ ہم جو روزانہ لاکھوں روپے فضول کاموں میں اڑا دیتے ہیں، کیا ہم اپنے گھروں اور دکانوں کے باہر راہگیروں اور پرندوں کے لیے پانی کا ایک مٹکا یا ٹینک نہیں رکھ سکتے؟ کیا ہم اپنے ماتحت کام کرنے والے ملازمین، چوکیداروں اور مزدوروں کو دوپہر بارہ سے چار بجے کے درمیان کام سے تھوڑا سا آرام نہیں دے سکتے؟ انسانیت تو یہ کہتی ہے کہ اس موسم میں ان کا بوجھ ہلکا کیا جائے، مگر افسوس کہ ہماری بے حسی موسم کی شدت سے زیادہ مہلک ہو چکی ہے۔

خدارا! اس ہیٹ ویو کو معمولی مت سمجھیں۔ جب تک بہت زیادہ مجبوری نہ ہو، دوپہر کے وقت گھروں سے باہر نکلنے سے گریز کریں۔ پانی کا استعمال اس حد تک کریں کہ پیاس نہ بھی ہو تو بھی چند گھونٹ پی لیں۔ اپنے بچوں اور بزرگوں کا خاص خیال رکھیں کیونکہ ان کا مدافعت کا نظام اس سختی کو برداشت نہیں کر پاتا۔ پیاس بجھانے کے لیے چائے یا کیفین والے مشروبات کے بجائے لسی, لیموں پانی اور ستو کا استعمال کریں۔

موسمِ گرما کی یہ شدت اب کوئی عارضی آفت نہیں بلکہ ہماری سالانہ حقیقت بن چکی ہے۔ ہمیں اب اس کے ساتھ جینا اور اس سے لڑنا سیکھنا ہوگا۔ ضرورت اس امر کی ہے کہ انتظامیہ صرف کاغذی کارروائیوں یا نمائشی اقدامات کے بجائے ہسپتالوں میں عملی طور پر ایسے فعال ’ہیٹ سٹروک سینٹرز‘ قائم کرے جہاں ادویات، پانی اور برف کی فراہمی کو یقینی بنایا جا سکے۔ لیکن سب سے بڑھ کر، ہمیں ایک دوسرے کا سہارا بننا ہوگا۔ اس تپتے ہوئے موسم میں کسی پیاسے کو پانی کا ایک گلاس پلا دینا، کسی سائے سے محروم انسان کو چند لمحوں کی چھاؤں فراہم کر دینا، اس وقت دنیا کی سب سے بڑی عبادت ہے۔ اگر ہم اب بھی نہ جاگے، اگر ہم نے اپنی زمین اور اپنے غریب انسانوں پر رحم نہ کھایا، تو یاد رکھیے کہ قدرت کا یہ انتقام اگلی بار اس سے بھی زیادہ ہولناک ہوگا، اور پھر پچھتاوے کے لیے ہمارے پاس وقت بھی نہیں بچے گا۔

جب تک ہم یہ نہیں سمجھیں گے کہ سایہ اور ٹھنڈا پانی کسی تعیش کا نام نہیں بلکہ شہریوں کا بنیادی حق ہے، تب تک گرمی کی یہ لہریں ہمارے ہسپتالوں کو لاشوں سے بھرتی رہیں گی۔ اب وقت ہے کہ ہم کنکریٹ کے جنگلوں کو دوبارہ سبزہ زاروں میں تبدیل کریں۔ گرمی کا یہ عذاب صرف قدرت کی طرف سے نہیں، بلکہ درختوں کی بے رحمی سے کٹائی اور ہماری اپنی غفلت کا نتیجہ بھی ہے۔ لیکن بحیثیتِ شہری، ہمارا فرض ہے کہ ہم اس موسم میں اپنا اور اپنے آس پاس کے لوگوں کا خیال رکھیں۔ یاد رکھیں، آپ کی تھوڑی سی توجہ اور صحیح معلومات کسی کی زندگی بچا سکتی ہے۔

کالم : فرید رزاقی
صدر، پاکستان فیڈرل یونین آف کالمسٹ اینڈ کری ایٹرز

کبھی کبھی قومیں لفظوں سے نہیں بلکہ تصویروں، رنگوں اور احساسات سے بولتی ہیں۔ “معرکۂ حق” کی تصویری نمائش بھی کچھ ایسی ہی ایک خاموش مگر طاقتور گفتگو تھی جس نے لاہور کے پلاک ہال کو صرف ایک نمائش گاہ نہیں رہنے دیا بلکہ اسے قومی جذبے اور فکری بیداری کا مرکز بنا دیا۔ بطور صدر پی ایف یو سی میرے لیے یہ لمحہ بے حد باعثِ فخر تھا کہ ہم نے اس قومی جذبے اور تخلیقی اظہار سے بھرپور پروگرام کو نہ صرف ترتیب دیا بلکہ اسے ایک ایسی صورت دی جو فن، صحافت اور حب الوطنی کے حسین امتزاج کی عکاس بن گئی۔
یہ محض ایک تقریب نہیں تھی، بلکہ ایک احساس تھا جو دیواروں پر آویزاں تصویروں سے جھلک رہا تھا۔ وہ تصویریں جو صرف رنگوں کا کھیل نہیں بلکہ ایک ایسے عزم کی کہانی تھیں جس نے یہ ثابت کیا کہ پاکستان آج بھی اپنے دفاع، وقار اور خودمختاری پر سمجھوتہ نہیں کرتا۔
اس نمائش کی سب سے بڑی خوبصورتی یہ تھی کہ یہاں صرف ماضی نہیں دکھایا گیا بلکہ ایک ایسا حال بھی پیش کیا گیا جو قوم کو اس کی اصل طاقت یاد دلاتا ہے۔ طلبہ و طالبات کے فن پاروں میں کہیں حوصلہ تھا، کہیں عزم، کہیں قربانی کا جذبہ اور کہیں وہ غیر متزلزل یقین جو پاکستانی قوم کی شناخت ہے۔
تقریب کا افتتاح اسپیکر پنجاب اسمبلی ملک محمد احمد خان نے کیا، جن کی گفتگو میں ریاستی وقار اور قومی اعتماد کی جھلک نمایاں تھی۔ ان کے ہمراہ صوبائی وزیر تعلیم رانا سکندر حیات، چیئرمین دی یونیورسٹی آف لاہور اویس رؤف، چئیرمین آرار گروپ ہمایوں سرور، سی ای او چیزیئس فوڈز عمران اعجاز، چیئرمین چیلتن گروپ نجم مزاری، رحمان عزیز خان ، ممبر قومی اسمبلی محترمہ شمائلہ رانا نے بھی نمائش کا دورہ کیا اس موقع پر جب انہیں یہ معلوم ہوا کہ ایک کم عمر آرٹسٹ جس کی اس مصوری مقابلے میں دوسری پوزیشن آئی ہے اس کے گردوں کا ڈائیلیسز چل رہا ہے انہوں ے فی الفور احکامات جاری کرتے ہوئے اس بچے کے تمام تر علاج کی ذمہ داری خود لینے کا اعلان کیا۔

تقریب میں دفاعی امور کے ماہرین بریگیڈیئر نادر میر، بریگیڈیئر سید غضنفر علی، بریگیڈیئر شاہد، بریگیڈیئر ٹیپو کریم اور کرنل شاہد حسین کی شرکت نے اس قومی مکالمے کو مزید وقار، سنجیدگی اور دفاعی بصیرت عطا کی، جن کی موجودگی وطنِ عزیز کے دفاعی پہلوؤں سے وابستہ فکری مضبوطی کی عکاس تھی۔
بلال احمد بٹ ، ڈاکٹر طارق شیرف زادہ سیرت اسکالر، غلام علی بیویو کریٹ اداکار راشد محمود اور دیگر معزز شخصیات کی موجودگی نے اس بات کو مزید مضبوط کیا کہ یہ نمائش صرف آرٹ نہیں بلکہ قومی سوچ کی نمائندگی ہے۔
یہاں صحافت بھی موجود تھی، سیاست بھی، فن بھی اور ریاستی اداروں کا اعتماد بھی۔ سلمان غنی، ایثار رانا ،عبدالمجید ساجد، صفدر علی خان،مصطفے کمال پاشا، میاں سیف الرحمان ، جیسے صحافیوں کی موجودگی اس بات کی علامت تھی کہ سچائی اور قومی بیانیہ آج بھی ساتھ ساتھ چل رہے ہیں۔ جبکہ حسن مرتضیٰ، جواد احمد اور دیگر سیاسی و سماجی شخصیات نے اس بات کو اجاگر کیا کہ اختلافات اپنی جگہ، مگر وطن کی بات پر سب ایک ہیں۔

سب سے زیادہ متاثر کن لمحہ وہ تھا جب نوجوان فنکاروں نے اپنے فن پارے پیش کیے۔ یہ صرف پینٹنگز نہیں تھیں، بلکہ ایک نسل کا اپنے وطن سے مکالمہ تھا۔ ایک ایسا مکالمہ جس میں فخر بھی تھا اور امید بھی۔
مصوری مقابلے میں شریک تمام فنکاروں کو اعزازات سے نوازا گیا، جبکہ پہلی تین پوزیشن حاصل کرنے والوں کے لیے کیش انعامات نے ان کی محنت کو ایک عملی پذیرائی دی۔ مگر اصل انعام وہ حوصلہ تھا جو ہر شریک کو ملا۔
اس پورے تخلیقی سفر میں ججز میڈیم صائمہ، مس افق جاوید، علی حمزہ اور عمران صاحب کا کردار انتہائی اہم تھا۔ ان کی فنی رہنمائی اور منصفانہ فیصلہ سازی نے اس مقابلے کو وقار عطا کیا۔ اگر یہ کہا جائے کہ یہ نمائش صرف فنکاروں کی نہیں بلکہ ایک فکری تربیت بھی تھی تو غلط نہ ہوگا۔
اسی طرح عمران احمد کاڈیہ کی انتظامی محنت اس پروگرام کی ریڑھ کی ہڈی تھی۔ وہ خاموشی سے، مگر مسلسل، اس پورے نظام کو جوڑنے میں مصروف رہے جہاں ہر چیز اپنے وقت اور اپنے انداز میں مکمل نظر آئی۔
اور پھر وہ لمحہ جب یہ سب کچھ ایک ہی احساس میں سمٹ آیا، کہ پاکستان صرف ایک ملک نہیں بلکہ ایک زندہ نظریہ ہے۔ چیئرمین پی ایف یو سی فرخ شہباز وڑائچ نے بجا کہا کہ آج کا پاکستان دنیا کے سامنے ایک نئے اعتماد، نئے تشخص اور نئی پہچان کے ساتھ کھڑا ہے۔ جناب چیئرمین فرخ شہاز وڑائچ نے اس نمائش کو ممکن بنانے میں کلیدی کردار ادا کیا ان کا تہہ دل سے شکریہ۔
اصل حقیقت یہ ہے کہ ایسی تقریبات صرف ایونٹس نہیں ہوتیں، یہ یاد دہانیاں ہوتی ہیں۔ ہمیں یہ یاد دلاتی ہیں کہ قومیں صرف فوج یا سیاست سے نہیں بنتیں، بلکہ قلم، فن، نوجوانوں کے خواب اور اجتماعی شعور سے بنتی ہیں۔
آخر میں یہ کہنا بے جا نہ ہوگا کہ آرگنائزنگ کمیٹی کے آراکین محمد نور الہدیٰ،عبالماجد ملک ، اظہر تھراج ، ساجد خان، وقار اسلم، فرحان خان، سعدیہ خالد، نے جس عزم، نظم اور خلوص کے ساتھ اس پورے پروگرام کو ممکن بنایا، وہ اپنی جگہ ایک الگ کہانی ہے۔ ان کا یہ اجتماعی کردار اس بات کی دلیل ہے کہ جب نیت قومی ہو تو کام خود راستہ بنا لیتا ہے۔
معرکۂ حق کی یہ نمائش دراصل ایک دن کی سرگرمی نہیں تھی، یہ ایک سوچ تھی جو یہ کہہ رہی تھی کہ پاکستان صرف نقشے پر ایک خطہ نہیں، بلکہ دلوں میں بسنے والا ایک یقین ہے۔

تحریر: انزلہ صدیقی

غرور اور تکبر سے بھرپور مودی سرکار نے پھلگھم میں ہونے والے حملے کو موہرا بنا کر پاکستان کے خلاف محض 10 منٹ میں ایف آئی آر درج کروائی۔ اس کے بعد بھارتی میڈیا، جموں و کشمیر اور اطراف کے مختلف حلقوں میں بھارتی ریاست کے حوالے سے سوالات اٹھنے لگے۔ عوامی سطح پر یہ سوال کیا جا رہا تھا کہ حملے کے وقت سیکیورٹی فورسز کہاں تھیں؟ سی سی ٹی وی کیمرے کیوں غیر فعال تھے؟ اور حملہ آور کس طرح کارروائی کے بعد فرار ہونے میں کامیاب ہوئے؟

چونکہ بھارتی حکومت نے پاکستان پر الزامات عائد کرتے ہوئے سخت مؤقف اختیار کیا، اس کے بعد خطے میں کشیدگی میں اضافہ ہوا۔ پھلگھم واقعے کو بنیاد بنا کر بھارت کی جانب سے مختلف عسکری اور سیاسی اقدامات کیے جانے کی اطلاعات سامنے آئیں۔

اس کے بعد بھارتی میڈیا پر متضاد اور غیر مصدقہ خبریں نشر کی جاتی رہیں، جنہیں بعض حلقوں میں تنقید کا سامنا بھی کرنا پڑا۔

اس پورے تناظر میں “آپریشن سندور” کا ذکر بھی سامنے آیا، جس کے دوران رات کی تاریکی میں کارروائی کی اطلاعات سامنے آئیں۔

ارشادِ باری تعالیٰ:

وَقَاتِلُوا فِي سَبِيلِ اللَّهِ الَّذِينَ يُقَاتِلُونَكُمْ وَلَا تَعْتَدُوا ۚ إِنَّ اللَّهَ لَا يُحِبُّ الْمُعْتَدِينَ

“اور اللہ کی راہ میں ان سے جنگ کرو جو تم سے لڑتے ہیں اور حد سے نہ بڑھو، بے شک اللہ حد سے بڑھنے والوں کو پسند نہیں کرتا۔”

اور ایک مقام پر اللہ تعالیٰ فرماتے ہیں:

وَقَاتِلُوهُمْ حَتَّىٰ لَا تَكُونَ فِتْنَةٌ وَيَكُونَ الدِّينُ لِلَّهِ

“اور ان سے لڑو یہاں تک کہ فتنہ باقی نہ رہے اور دین اللہ ہی کا ہو جائے۔”

اس صورتحال کے دوران پاکستان کی مسلح افواج نے واضح مؤقف اختیار کیا کہ اگر ملک پر حملہ ہوا تو بھرپور دفاع کیا جائے گا۔

اسی تناظر میں “آپریشن بنیان المرصوص” کا آغاز کیا گیا، جس کا تصور اتحاد، استقامت اور مضبوطی کی علامت ہے۔ “بنیان المرصوص” کا مطلب سیسہ پلائی ہوئی دیوار ہے، یعنی ایک ایسی متحد قوت جو دشمن کے مقابلے میں مضبوطی سے کھڑی ہو۔

قرآنِ مجید میں سورۃ الصف میں ارشاد ہوتا ہے:

اِنَّ اللّٰهَ يُحِبُّ الَّذِيْنَ يُقَاتِلُوْنَ فِیْ سَبِيْلِهٖ صَفًّا كَاَنَّهُمْ بُنْيَانٌ مَّرْصُوْصٌ

ترجمہ: بے شک اللہ ان لوگوں سے محبت فرماتا ہے جو اس کی راہ میں اس طرح صف بستہ ہو کر لڑتے ہیں گویا وہ سیسہ پلائی ہوئی دیوار ہیں۔

اس موقع پر پوری پاکستانی قوم یکجہتی کے ساتھ اپنی افواج کے شانہ بشانہ کھڑی رہی۔ دفاعِ وطن کے جذبے نے قوم کو ایک لڑی میں پرو دیا۔

پاکستانی افواج نے جرات، حکمت اور استقامت کے ساتھ صورتحال کا سامنا کیا، جبکہ ملک میں قومی یکجہتی کا جذبہ مزید مضبوط ہوا۔

بعد ازاں صورتحال میں کشیدگی کم کرنے اور امن کی طرف پیش رفت کے اشارے بھی سامنے آئے۔

قرآنِ کریم میں اللہ تعالیٰ فرماتے ہیں:

وَإِن جَنَحُوا لِلسَّلْمِ فَاجْنَحْ لَهَا وَتَوَكَّلْ عَلَى اللَّهِ

“اور اگر وہ صلح کی طرف مائل ہوں تو آپ بھی اس کی طرف مائل ہو جائیں اور اللہ پر بھروسہ کریں۔”

اس پورے منظرنامے سے یہ سبق ملتا ہے کہ اتحاد، برداشت اور قومی یکجہتی ہی کسی بھی قوم کی اصل طاقت ہے۔

علامہ اقبال نے کیا خوب فرمایا:

افراد کے ہاتھوں میں ہے اقوام کی تقدیر

ہر فرد ہے ملت کے مقدر کا ستارہ

پاکستان زندہ باد۔